იაფი კვება პარიზში

ბევრი მოგზაურობს პარიზში, განსაკუთრებით მას შემდეგ რაც ქუთაისიდან პარიზში (ბოვე) ავიარეისების შესრულება დაიწყო დაბალბიუჯეტურმა Wizz Air-მა. ბიუჯეტური მოგზაურობისთვის, ის რაც ჩვენ ყველას ძალიან გვიყვარს, იაფად ჩაფრენის გარდა საჭიროა იაფად კვება პარიზში. მითუმეტეს, რომ საოცნებო ქალაქი ძალიან ძვირია, განსაკუთრებით საქართველოდან ჩასული ტურისტისთვის.

როგორ შეიძლება იაფად კვება პარიზში?

საშუალოდ, რესტორანში სადილი ერთ კაცზე 15-20 ევროზე ნაკლები არ ჯდება. ეკონომიის ერთ-ერთი ვარიანტია საკვების მომზადება 30 ევროს ფასდაკლებით დაქირავებულ Airbnb-ის ბინაში. მაგრამ თუ პარიზში მზარეულობის სურვილი არ გაქვთ, ან სასტუმროში დაბინავდით, იქ კი შემწვარ-მოხრაკულის მომზადება გამორიცხულია, გირჩევთ მოძებნოთ კვების ობიექტი სადაც 7 ევროდაც ძალიან კარგად დანაყრდებით.

ლაპარაკია კაფეების ქსელ Flunch-ზე. მისი მუშაობის პრინციპი ასეთია, თქვენ თანხას იხდით თეფშის სანაცვლოდ და არა კერძისთვის. ამ თეფშზე შეგიძლიათ დააწყოთ იმდენი სალათი და გარნირი რამდენიც დაეტევა. ხოლო ხორცის ან თევზის ნაჭერში თანხა დამატებით უნდა გადაიხადოთ, არჩევანი კი დიდია. ყველაზე პატარა თეფში ღირს 2.8 ევრო, მაგრამ ის ძალიან პატარაა და ზედ ბევრი არაფერი დაეტევა. საშუალო თეფშის ფასი 3.75 ევროა, ხოლო დიდი 5 ევრო ღირს. წვენები, ჩაი და ყავა კი 1 ევრო დაგიჯდებათ 🙂

ამ სურათზე არის ერთი დიდი და ერთი საშუალო თეფში, სულ 15 ევროს საკვები. ორი კაცის შემთხვევაში ასეთი სქემა ყველაზე მეტად ამართლებს. თეფში უნდა აიღოს კაფეში შესულმა ყველა მომხმარებელმა, რადგან ორისთვის ერთ დიდ თეფშზე სალათის დაწყობას შეიძლება მოახერხოთ, მაგრამ გარნირს არ მოგცემენ, და თანაც სალაროსთან თეფშებისა და სტუმრების რაოდენობას მკაცრად აკონტროლებენ. სამაგიეროდ ჩაიზე 1 ევროს ეკონომიას გააკეთებთ თუ კაფეში ჩაის პაკეტით შეხვალთ, რადგან ცხელი წყალი უფასოა და ამისთვის არავინ გისაყვედურებთ.

გაითვალისწინეთ, რომ თუ ხორცის და გარნირის აღებას გეგმავთ თეფშზე შესაბამისი ადგილი უნდა გქონდეთ, ანუ სალათით ნახევრად უნდა შეავსოთ. კიდევ ერთხელ ვიმეორებ, რომ არჩევანი საკმაოდ დიდია და ყველა მოახერხებს მისთვის მისაღები საკვების კომბინირებას. სწორედ ამიტომ კაფეში თითქმის ყოველთვის რიგია, განსაკუთრებით 13 საათის შემდეგ. ამიტომ თადარიგი ცოტა ადრიანად დაიჭირეთ. 🙂

Flunch-ის მისამართები პარიზში

Beaubourg 23 (პომპიდუს ცენტრის გვერდით)
Caulaincourt 1 (მულენ რუჟის მონმარტრის მახლობლად)
Boulevard de Clichi 80 (მონმარტრის მახლობლად, მეტრო Blanche),
Pierre Lescot 5 და Rambuteu ქუჩა (პომპიდუს ცენტრთან, მეტრო Rambuteu)

ამ ქსელში ტკბილეულის გარეშეც არ დარჩებით, ნამცხვრების და კროასანის უზარმაზარი არჩევანია. ღვინოც ბლომად არის.