Airbnb-მ, 250 მილიონი აშშ დოლარი გამოყო იმ მასპინძლების დასახმარებლად, რომელთა საქმიანობაზე გავლენა იქონია ახალი კორონავირუსის პანდემიამ.
ეს იმას ნიშნავს, რომ თუ სტუმარმა COVID-19-ის გამო გააუქმა 14 მარტი – 31 მაისის პერიოდის ჯავშანი, Airbnb მასპინძელს, ბინის მფლობელს, გადაუხდის გაუქმებული ჯავშნიდან მისაღები თანხის 25 პროცენტს. Airbnb-მ გამოაცხადა, რომ ეს გადაწყვეტილება გავრცელდება უკანა რიცხვითაც, ანუ უკვე გაუქმებულ ჯავშნებზეც.
Airbnb ამ გადაწყვეტილებით ცდილობს გამოასწოროს ბინების მფლობელთა, მასპინძელთა მდგომარეობა. Airbnb-ს საიტზე რეგისტრირებული მასპინძლები გამოუვალ მდგომარეობაში აღმოჩნდნენ კორონავირუსის მიზეზით ჯავშნების მასობრივად გაუქმებისა და სტუმრებისთვის თანხების დაბრუნების გამო.
- რა არის Airbnb?
- 44 ევროს ფასდაკლება Airbnb-ზე
- როდის არ ამართლებს Airbnb
- Airbnb – გამდიდრების შანსი ყველასთვის
ბრაიან ჩესკიმ, Airbnb-ს ერთ-ერთმა დამფუძნებელმა და მმართველმა დირექტორმა, სპეციალურ მიმართვაში მოუბოდიშა პარტნიორ მასპინძლებს, რომ გადაწყვეტილება სტუმრებისთვის თანხების დაბრუნების შესახებ მათთან კონსულტაციების გარეშე მიიღო: „იცოდეთ, რომ ეს არ იყო საქმიანი გადაწყვეტილება, არამედ ის ეფუძნებოდა საზოგადოებრივი ჯანდაცვის პრინციპებსო“.
ამგვარი გადაწყვეტილების კომპენსაციის მიზნით 250 მილიონი აშშ დოლარის გამოყოფის გარდა, Airbnb-მ შექმნა 10 მილიონი აშშ დოლარის ფონდი. მასში 9 მილიონი დამფუძნებლებმა გადარიცხეს, ხოლო 1 მილიონი კომპანიის თანამშრომლების შენატანია. ამ ფონდიდან გაიცემა 5 000 დოლარის გრანტები Airbnb-ს „სუპერმასპინძლის“ (სუპერჰოსტი) სტატუსის მქონე პარტნიორებისთვის.
ბრაიან ჩესკის მიმართვაში ასევე აღნიშნულია, რომ Airbnb-ს 40 ათასამდე მასპინძელი დაეხმარა კომპანიას კორონავირუსთან ბრძოლის ეგიდით 100 ათასამდე ექიმის დაბინავებაში.
Airbnb მთელ მსოფლიოში ბინების ონლაინდაჯავშნის პლატფორმაა, რომლითაც საქართველოშიც აქტიურად სარგებლობენ როგორც ტურისტები, ასევე ბინების გამქირავებლები. ამჟამად ამ სისტემაში საქართველოდან 10 000-ზე მეტი ბინის განცხადებაა გამოქვეყნებული.
