მთავარი ქალაქებისინოპი სინოპი – აჭარის ალტერნატივა შავი ზღვისპირეთში

სინოპი – აჭარის ალტერნატივა შავი ზღვისპირეთში

by მე მოგზაური
0 კომენტარი
სინოპი

მოხიბლული ვარ ბათუმით, მაგრამ კლიმატი კაიფს ტეხავს. აჭარის და მთლიანად საქართველოს შავი ზღვისპირეთის სხვა ადგილებში კლიმატს კიდევ ემატება გაუმართავი ინფრასტრუქტურა, მომსახურების დაბალი დონე და სიძვირე.

ეს ფოტოები თურქეთის შავი ზღვის სანაპიროზე უძველეს ქალაქ, სინოპში გადავიღე.

სინოპი, პორტი და ძველი ციხესიმაგრე

სინოპის შესახებ ადრეც ვწერდი და ახლა ბათუმში გასეირნების შემდგ კიდევ ერთხელ გამახსენდა.

სინოპი

სინოპი წარმოადგენს ნახევარკუნძულს, რომელიც შავ ზღვაში ისე არის შეჭრილი, რომ ზღვის დინება და ტალღები მხოლოდ მის ერთ ნაპირს ეჯახება.

სინოპის ქვიშიანი სანაპირო

მეორე მხარეს კი მშვიდი ზღვა, სუფთა წყალი და ოქროსფერი ქვიშებია.

თევზები

წყალი იმდენად გამჭვირვალეა, რომ თავისუფლად ჩანს გათამამებული თევზების “ტინგიცი” 🙂 მაგრამ ამ სანაპიროს ერთი პატარა ნაკლი აქვს, უამინდობის დროს, რომელიც იშვიათობაა, დინებას ნაპირზე გამოაქვს წყალმცენარეები. პლაჟის ნაწილს არ ასუფთავებენ, ამიტომ ზოგიერთ ადგილას წყალმცენარეები ქვიშაზე კოტრიალის საშუალებას არ იძლევა.

სანაპირო

თუმცა კი არ მახსენდება სინოპში ჩემი რეკომენდაციით ჩასული ადამიანი უკმაყოფილო დაბრუნებულიყოს. სინოპში რამდენჯერმე ყოფნისას წვიმიანი სულ ორიოდე დღე მახსენდება. მისი მდებარეობა ხელს არ უწყობს ღრუბლების თავმოყრას და გადაუღებელ წვიმას.

სინოპის პლაჟი

სინოპი და მისი ეკონომიკა

ბათუმი გართობის ცენტრია არა მარტო კავკასიის ქვეყნებისთვის. ბათუმში ჩადის თურქეთის შავი ზღვის სანაპიროს მოსახლეობის მნიშვნელოვანი ნაწილი. რაც შეეხება აჭარის სხვა ადგილებს ისინი ვერც გართობის საშუალებებით და ვერც დასვენების სერვისით ვერ გაუტოლდებიან სინოპის შესაძლებლობებს.

სასტუმრო "დიოგენი"

ეს არის ხედი სასტუმრო “დიოგენის” აივნიდან. ამ სასტუმროში ერთი საოჯახო ნომერი, რომელიც გათვლილია 4-5 კაცზე (მონდომების შემთხვევაში 6-იც მოთავსდება) 100-დან 140 დოლარამდე ღირს. ფასი დამოკიდებულია სტუმრის ვაჭრობის უნარზე, რელიგიურ დღესასწაულებზე, თურქული ლირის კურსზე … ბოლოს დღეში 95 დოლარი გადავიხადეთ იმის გამო, რომ ჩვენი წამოსვლის წინა დღით რამადანი დაიწყო. საოჯახო ნომერი აერთიანებს ერთ დიდ და ერთ მომცრო ოთახს, სამზარეულოს, აბაზანა-ტუალეტს და აივანს მშვენიერი ხედით.

სასტუმრო დიოგენეს კორპუსები

თუ ზღვა არ მოგეწონებათ, შეგიძლიათ აუზში ან აუზისპირას დაისვენოთ. აქვეა ღია ბარიც და საღამოობით ცოცხალი მუსიკაც არის ხოლმე, თურქული როკიდან დაწყებული და ლაზური “დიდოუ ნანათი” დამთავრებული.

IMG_8261

სასტუმროში კვება ერთჯერადია, ე.წ შვედური სუფრა, ყველაფერია იმისთვის, რომ სუფთა ჰაერზე კარგად დანაყრდე 🙂 შეგიძლიათ რესტორანში ნებისმიერ დროს შეუკვეთოთ, თუმცა ქალაქის რესტორნების დალაშქვრა უფრო საინტერესოა.

სინოპის რესტორნები

თევზის მოყვარულებისთვის პორტის გასწვრივ, ზღვაში მოტივტივე კაფე-რესტორნების ცვენაა. თურქული ქაბაბების და ხორცის კერძების დიდი არჩევანით. საშუალოდ, საკვები ოდნავ უფრო ძვირი ჯდება ვიდრე აჭარაში.

პორტისპირა კაფეები

თურქეთი ბოლო წლებში სწრაფ ეკონომიკურ ზრდას განიცდიდა და ცხოვრების დონის მომატებასთან ერთად ფასებიც გაიზარდა, მაგრამ ქართველის ჯიბისთვის სრულებით ხელმისაწვდომი რჩება.

დოლმუში

სინოპი მცირე ზომის ქალაქია, მაგრამ გადაადგილებისთვის მაინც დაგჭირდებათ ტრანსპორტი.  “დოლმუში” (გამოტენილი, გადაჭედილი) – ასე ჰქვია იქაურ “მარშრუტკას” – წარმოადგენს მინიატურულ ავტობუსს, რომელიც ზოგჯერ მართლაც გადატენილია.

წლების მანძილზე მგზავრობის ფასი 0,5-დან 1.5 ლირამდე გაიზარდა რაც დაახლოებით 2 ლარია. გაჩერებისთვის მძღოლს დაუყვირეთ “დურაქ”! თავიდან მეც მეხამუშა, მაგრამ სტოპ რომ ვერ გაიგო და ჩემს სასტუმროს გასცდა, მერე სულ დურაკი ვეძახე, გაჭრა 🙂 შემოკლებით “დურ” გაჩერებას ნიშნავს.

იქაური საზოგადოებრივი ტრანსპორტის ტრადიციაა: უფროსი, რაც არ უნდა მოხუცი იყოს ადგილს უთმობს ბავშვს, მომავალ თაობას.

სინოპის ფლოტი

სხვა სასტუმროები გაცილებით იაფია. ჩემი რეკომენდაციით სინოპში ჩასულმა ერთმა წყვილმა ახლადგახსნილ სასტუმროში 2 ადგილიანი ნომერი 35 დოლარად დაიქირავა. კარგი პლაჟით გამოირჩევა ერთ-ერთი სასტუმრო, რომელსაც ქართველები ფლობენ.

ხილ-ბოსტანი

ხილი და ტკბილეული თავზე საყრელი და ძალიან გემრიელია.

იქაური ატმის და საზამთროს არომატი ყოველთვის მახსენდება, როდესაც თბილისში ნორმალურ საზამთროს ვერ ვპოულობ.

თუ ვაჭრობა არ დაგეზარებათ ფასდაკლება გარანტირებულია, მითუმეტეს თუ გამყიდველი ლაზი ან გურჯი (ძველი ქართველი) შეგხვდათ.

 

ღირშესანიშნაობა

სინოპის ერთ-ერთი ღირშესანიშნაობა ძველი ქართველებია (გურჯები). ისინი აქ ძირითადად საქართველოს რუსეთის იმპერიასთან მიერთების დროს გადმოსახლდნენ.

მაგრამ. სინოპი მანამდეც ყოფილა ქართველთა სამიზნე. თამარ მეფესაც კი გაულაშქრია სინოპის ციხის დასაპყრობად.

ადრე სინოპის ძალაუფლება ფარავდა სივრცეს სადაც ისტორიული ქართველური ტომები – მოსინიკები, ხალიბები და კოლხები სახლობდნენ.

სინოპის ციხესიმაგრე

ქალაქის სიმბოლოს დიოგენი წარმოადგენს. ითვლება, რომ დიოგენი სწორედ სინოპში ფილოსოფოსობდა.

დიოგენი

სინოპი სელჯუკების გავლენის სფეროში 15-ე საუკუნიდან მოექცა და მას შემდეგ იწყება ქრისტიანულის მუსულმანური კულტურით ჩანაცვლების ხანა.

მაგრამ აქ ქრისტიანული კულტურის ძეგლები დღემდეა შემონახული. მუზეუმში დაცულია მრავალი ექსპონატი.

ჯვარი

მართმადიდებლური ხატების გადაღების უფლება არ მოგვცეს.  ექსპონატების უმრავლესობა ბიზანტიური კულტურის ნიმუშია, მათ შორისაა ქვევრიც.

ქვევრი სინოპში

ძველის და ახლის შერწყმის ადგილი

ძველი და ახალი სინოპი

შეძლებული სინოპელების საცხოვრებელი დაახლოვებით ასე გამოიყურება

სახლი სინოპში

ასეთ სახლებში სხვადასხვა სართულზე სხვადასხვა ოჯახი ცხოვრობს. რაღაც ქალაქურისა და აგარაკული ცხოვრების ნაზავია.

სახლი სინოპში

ქორწილი არ გეგონოთ, წინდაცვეთის (მუსულმანური ნათლობის) ცერემონიალია.

წინდაცვეთის ცერემონიალი

მოკლედ, თუ აჭარის ალტერნატივას ეძებთ და მოგზაურობა არ გეზარებათ ეწვიეთ სინოპს 🙂

სერფინგი სინოპში

რეკომენდაციები:

  • იაფი ავიაბილეთების საძიებელი საუკეთესო საშუალება: kiwi.com
  • დაგვიანებული, გადადებული ან გაუქმებული ავიარეისების კომპენსაცია: compensair.com
  • დაბალფასიანი საცხოვრებელი შეგიძლიათ დაჯავშნით Airbnb-ზე. თუ ამ გვერდიდან დარეგისტრირდებით 44 ევროს ფასდაკლებას მიიღებთ.
  • თუ სასტუმროებს დაეძებთ, მაშინ ეწვიეთ სასტუმროების ყველაზე დიდ საძიებო სისტემას: Booking.com
  •  
  •  
  •  
  •  
  •  
  •  
  •  
0 კომენტარი
0

სხვა მასალები

კომენტარები